Encontro no Nadal en Muros (25/12/09)
Patrocinado pola Excma. Deputación Provincial de A Coruña e coa colaboración da Parroquia muradana de San Pedro, a Coral Montemar (Noia-Pobra) organizou, como fixo en anos anteriores, un Festival de Vilancicos, no que interviñeron tres corais do Concelllo de Muros: "Agustín González" de Louro, San Xoán de Serres e Don Diego de Muros, ademais da coral organizadora.
Cada unha das agrupacións cantou tres temas de Nadal, que caseque coincidían cos que interpretaran no Festival de Caixanova de A Coruña, cunhas mínimas variantes.
A Coral de Louro interpretou Nadal, con letra de Agustín González; Alba, si cantais, sobre un poema de Ramón Rey García e Dúrmete, Meniño. As dúas primeiras cancións dirixiunas Luis Rama Lestón.
Polo que atinxe á Coral San Xoán de Serres, estivo dirixida nas primeiras cancións por José Fernández Lestayo ( o Meira); cantigou Tanenbaum, Resonet in laudibus e Sobre la noche.
A Coral Don Diego de Muros ofreceu Paz en la Tierra; Pastores, venid (ámbalas dúas dirixidas por Renato Pestonit Brenlla e Vinde, Pastores.
Finalmente a Coral Montemar cantigou Na Medianoite, Os avós do Neno e Hodie Christus natus est. Rematando o acto, as catro corais interpretaron conxuntamente o Adeste fideles (Cheguémonos ó Portal) e o Noche de Paz.
Como a xente xa estaba (de grandes comidas y cenas están las sepulturas llenas) sen facer aínda dixestión, cada moucho foise para a súa oliveira e aquí non houbo máis, salvo unhas verbas finais de Don Casimiro, o antigo párroco de Muros, que presidía o acto.
